The Malegaon High School & Jr.College 

یہ میرا چمن ، یہ میرا چمن ، گل ریز چمن ، گل بار چمن

معصوم بہاروںکا مرکز ، پر کیف نظاروں کا مسکن،

             یہ میرا چمن ۔۔۔۔۔

یہ مدرسہ علم و دانش کا  ،  اپنی ہی تلاش و کاوش کا 

ہم کیا ہیں  ،  ہمارا مقصد کیا  ؟  اس نکتے کی فہمائش کا 

مل جل کے یہاں ہم سیکھیں گے جینے کی ادا مرنے کا چلن

             یہ میرا چمن ۔۔۔۔۔

دیتا ہے ہمیں منزل کا پتہ اپنے لئے سنگ میل ہے یہ 

کھلتے ہیں جہاں پر دل کے کنول اک ایسی انوکھی جھیل ہے یہ

مرجھائے گلوں کو مہکانا ہے مشغلہ اربابِ چمن 

             یہ میرا چمن ۔۔۔۔۔

تا عمر مہکتے رہنے کو کچھ دیر رلایا جاتا ہے 

آئینہ بنانے کی خاطر پتھر پگھلایا جاتا ہے

اربابِ جنوں کو حاصل ہے وہ سوزِ دروں وہ دھن وہ لگن

             یہ میرا چمن ۔۔۔۔۔

میدانِ عمل میں آئیں گے ہم اک نیا پیغام  لئے 

جلووں سے نکھرتی صبح لئے پھولوں سے مہکتی شام لئے

کل گردشِ دوراں دیکھے گی اپنی بھی کُلاہ کج کی پھبن

یہ میرا چمن ، یہ میرا چمن ، گل ریز چمن ، گل بار چمن

معصوم بہاروںکا مرکز ، پر کیف نظاروں کا مسکن